Hizi Ni Athari Zinazoweza Kusababishwa Na Marafiki Wako Wa Mtandaoni

MNAMO Aprili 2, 2016, kabla ya kujiua mwanamke fulani mwenye umri wa miaka 42 aliandika ujumbe kwenye tovuti hii ya Facebook. Ujumbe wake ulikuwa kilio cha kuomba msaada. Ingawa alikuwa na “marafiki” zaidi ya elfu moja kwenye mtandao, hakuna hata mmoja aliyemsaidia. Siku moja baadaye, majirani walimpata akiwa amekufa. Alijiua kwa kumeza dawa nyingi kupita kiasi.

Leo, kupitia teknolojia inayohusiha mitandao ya kijamii tunaweza kupata mamia, au hata maelfu ya “marafiki” kwenye mitandao ya kijamii kwa kuongeza tu majina yao kwenye orodha yetu ya anwani katika kompyuta. Mfano halisi ni mimi mwenyewe…wakati huu ninapoandika makala haya nina marafiki 5000 Facebook, 5,735 LinkedIn, Wafuasi 3287 Twitwer, wafuasi zaidi 3000+ kwenye Instagram, jumla zaidi ya 125,000 ya watembeleaji wa tovuti hii https://www.lusabaraessau.com tangu kuanzishwa kwake mwezi April n.k. Marafiki hawa si haba endapo tu wangelikuwa marafiki wa kweli, wasio wa kuishia kwenye mitandao…

Pia, tukitaka kukatisha “urafiki” na yeyote kati yao, tunafuta tu jina lake kutoka kwenye orodha yetu. Hata hivyo, msiba uliotajwa mwanzoni kuhusu yule mwanamke huko Kenya unakazia ukweli muhimu—watu wengi hatuna marafiki wa kweli. Utafiti mmoja wa hivi karibuni unaonyesha kwamba ingawa watu wanawasiliana sana, idadi ya marafiki wa kweli imepungua.

Bila shaka, kama watu wengi unakubali kwamba ni muhimu kuwa na marafiki wa kweli. Huenda pia umetambua kwamba urafiki unahusisha mengi kuliko kuongeza majina kwenye orodha ya kompyuta au simu yako. Rafiki wa kweli anapaswa kuwa na sifa zipi? Unawezaje kuwa rafiki mzuri? Ni mambo gani yanayohitajika ili kupata marafiki wa kudumu?

Tunapendekeza Makala Zifuatazo:

Hebu Tuwachunguze Watu Tunaotaka Wawe Marafiki Wetu…

Ikiwa unataka kufanya urafiki na mtu fulani ambaye amekuomba urafiki, jiulize hivi, ‘Marafiki wake ni nani?’ Unaweza kufahamu mengi kumhusu mtu kwa kuchunguza marafiki wake wa karibu. Isitoshe, watu wakomavu na wanaoheshimika katika jamii wanamwonaje mtu huyo? Kwa kuongezea, ni jambo la busara kuchunguza jinsi watu tunaotaka wawe marafiki wetu wanavyowatendea wengine, hasa jinsi wanavyowatendea watu ambao hawawezi kuwafaidi kwa njia yoyote. Ikiwa kwa kawaida mtu huyo si mnyoofu, si mwaminifu, hana subira, na hawajali wengine, je, kweli atakutendea vizuri nyakati zote?

Ili ufahamu utu wa mtu unahitaji subira, ustadi, na wakati kumchunguza katika hali za kawaida. Tunahitaji kuzungumza na watu tunaotaka kufanya urafiki nao kuhusu mambo mazito, yaani, mambo yanayofunua nyutu zao, nia zao, na maadili yao. Wao ni watu wa aina gani? Je, ni wenye fadhili au ni wenye ubaridi? Je, wao ni wachangamfu na wenye mtazamo mzuri au ni wenye kuchambua-chambua na wenye mtazamo mbaya? Je, wana ubinafsi? Je, ni waaminifu au si waaminifu? Ikiwa mtu huwachambua wengine mnapokuwa pamoja, je, hatakuchambua usipokuwepo?

Kumbe Yatupasa Kuweka Fikra Zaidi Katika Aina Ya Marafiki Tunapenda Kuwa Nao…

Si lazima utafute marafiki wapya ili uwe na marafiki wazuri. Ikiwa tayari una marafiki wazuri, kwa nini usijaribu kuimarisha urafiki wenu? Marafiki wetu wa muda mrefu ni wenye thamani sana, na tunapaswa kuwaona hivyo. Kamwe usipuuze uaminifu wao.

Zaidi ya yote, kumbuka kwamba furaha ya kweli na urafiki wa kweli hutegemea kujitoa na kutumia wakati na mali zako. Utapata faida nyingi sana ukijitahidi na kujidhabihu. Hata hivyo, hutafanikiwa ukijifikiria mwenyewe tu unapochagua marafiki. Kwa hiyo, unapotaka kuanzisha urafiki, usifikirie tu watu unaovutiwa nao au wale ambao wanaweza kukufaidi. Fanya urafiki na wale ambao hupuuzwa na wengine au wale wanaoona ni vigumu kupata marafiki.

Kama umefaidika na makala hii naomba unisaidie kuisambaza kwa marafiki zako wa Facebook kwa kubofya (share) hapo chini.  

Leave a Reply